ಬಾಯಿ ಹುಣ್ಣಿಗೆ ಗುಡ್ ಬೈ ಹೇಳಿ

ಇದು ಬಿಳಿ ಕುಸುಮಾಲೆ. ಗುಡ್ಡದ ಮೇಲೆ ಹಿಂಡುಗಳಲ್ಲಿ ಇರುವುದು ಕೆಂಪು ಕುಸುಮಾಲೆ. ಎರಡೂ ಓಕೆ. ಬಿಳಿ ಕುಸುಮಾಲೆ ಬೇರು ಬಿಳಿಮುಟ್ಟು(ವೈಟ್‌ ಡಿಸ್ಚಾರ್ಜ್)‌ ಇರುವವರಿಗೆ ಸ್ವಚ್ಚವಾದ ಅಂದರೆ ೨ನೇ ಬಾರಿ ಅಕ್ಕಿ ತೊಳೆದ ದಪ್ಪ ನೀರಿನಲ್ಲಿ ತೇಯ್ದು ಕೊಟ್ಟರೆ ಬಹುಬೇಗ ಕಡಿಮೆ ಆಗುತ್ತದೆ ಹಾಗೇ ಮೂತ್ರದಲ್ಲಿ ಧಾತು ಹೋಗುವವರಿಗೆ ಕೂಡಾ ಒಳ್ಳೆಯದು ಎಂದು ಹಿರಿಯರು ಹೇಳಿದ್ದು ಕೇಳಿದ್ದೆ. ಹಾಗೇ ಕೆಂಪು ಕುಸುಮಾಲೆ ಬೇರನ್ನು ತರಿಸಿಕೊಂಡು ನನ್ನ ಆಯಿ ಕಡ್ಲಂಗಡ್ಲೆ ಬೇರಿನ ಜೊತೆ ಹಾಕಿ ಕಷಾಯ ಬತ್ತಿಸಿ ಪ್ರತಿದಿನ ಹಾಲಿಗೆ ಹಾಕಿ ಕುಡಿಯುತ್ತಿದುದನ್ನು ನೋಡಿದ್ದೆ. ಅದು ಅತಿಯಾದ ರಕ್ತಸ್ರಾವದಿಂದ ರಕ್ತ ಅಂದರೆ ಹಿಮೊಗ್ಲೋಬಿನ್‌ ಕಡಿಮೆ ಆದರೆ ಸರಿಪಡಿಸಿಕೊಳ್ಳಲು ತುಂಬಾ ಉತ್ತಮ ಪರಿಣಾಮ ಕೊಡುತ್ತದೆ ಎಂದು ಹೇಳುತ್ತಿದ್ದರು. ಹಾಗೇ ತುಂಬಾ ಪರಿಮಳದ ಗುಲಾಬಿ ಬಣ್ಣದ ಕಷಾಯ ಅದಾಗಿತ್ತು. ನಾನು ನಮ್ಮ ಮನೆಯಲ್ಲಿ ಅತ್ತೆಯ ಕಾಲದಿಂದ ಅಂದರೆ ಸುಮಾರು ೩೦ ವರ್ಷಗಳಿಂದ ಬಿಳಿ ಕುಸುಮಾಲೆ ಗಿಡ ಇರುವುದನ್ನು ನಡಿದ್ದೆ. ಅತ್ತೆ ಅದರ ಹೂವಿನ ತಂಬ್ಳಿ ಮಾಡುತ್ತಿದ್ದರು. ನನಗೆ ಈಗ ಸುಮಾರು ೧೫ ವರ್ಷಗಳ ಹಿಂದೆ ಯಾರು ಹೇಳಿದ್ದು ನೆನಪಿಲ್ಲ, ಆದರೆ ಬಾಯಿಹುಣ್ಣಿಗೆ ಹೆಬ್ಬಾರರಿಗೆ, ಮಕ್ಕಳಿಗೆ ಇದರ ಪ್ರಯೋಗ ಅದ್ಭುತ ಯಶಸ್ಸು ಕಂಡಿದ್ದಂತೂ ಸತ್ಯ. ಈವರೆಗೆ ಮತ್ತೆ ಬಾಯಿಹುಣ್ಣಿನ ಬಾಧೆ ಅವರನ್ನು ಕಾಡಿಲ್ಲ. ತಿಂಗಳಿಗೆ ೨೫ ದಿನ ಅವರಿಗೆ ಬಾಯಿ ಹುಣ್ಣು ಆಗುತ್ತಲೇ ಇರುತ್ತಿತ್ತು. ರಾತ್ರಿ ಮಲಗುವಾಗ ಹಲ್ಲುಜ್ಜಿ ಮುಗಿದ ಮೇಲೆ ಈ ಬಿಳಿಕುಸುಮಾಲೆಯ ಮೊಗ್ಗನ್ನು ಚೆನ್ನಾಗಿ ಜಗೆದು ಇಡೀ ಬಾಯಿಯ ಒಳಗೆ ಅದರ ರಸ ತಾಗುವಂತೆ ಜಗೆದು ನುಂಗುತ್ತಿದ್ದರು. ಮತ್ತೆ ನೀರು ಕುಡಿಯಬಾರದು. ಹೀಗೆ ೨,೩ ದಿನ ಮಾಡಿದಾಗ ಬಾಯಿಹುಣ್ಣು ಕಡಿಮೆಯಾಗಿ ತಿಂಗಳಿಗೆ ಒಮ್ಮೆ ಅಥವಾ ಎರಡು ಬಾರಿ ಆಗಿದ್ದಿತ್ತು! ನಂತರ ಮತ್ತೆ ಮತ್ತೆ ಅದೇ ಪ್ರಯೋಗ ಮಾಡಿದಾಗ ಇದೀಗ ಸುಮಾರು ೧೫ ವರ್ಷಗಳಿಂದ ಬಾಯಿಹುಣ್ಣು ಆಗಿಲ್ಲ!! ಅಂತಹ ದಿವ್ಯೌಷಧವಾಗಿ ಬಿಳಿಕುಸುಮಾಲೆ ಮೊಗ್ಗು ಕೆಲಸ ಮಾಡಿದೆ. ನಾನು ರಾತ್ರಿ ೧೧ಕ್ಕೂ ಬ್ಯಾಟರಿ ತೆಗೆದುಕೊಂಡು ಹೋಗಿ ಪಕ್ಕದ ಮನೆ ಗಿಡದಿಂದ ಈ ಮೊಗ್ಗು ತಂದಿದ್ದಿದೆ! ಈಗ ನಮ್ಮ ಮನೆಯಲ್ಲಿ ಗಿಡ ಬೆಳೆಸಿದ್ದೇನೆ. ಸಾಕಷ್ಟು ಹೂ ಬಿಡುತ್ತಿದೆ.... ಆದರೆ ಬಾಯಿಹುಣ್ಣು ಮಾಯವಾಗಿದೆ..... ಕುಂಡದಲ್ಲೂ ಆರಾಮಾಗಿ ಈ ಆರೋಗ್ಯದಾಯಿನಿ ಗಿಡ ನೀವೂ ಬೆಳೆಸಿಕೊಳ್ಳಬಹುದು. ಪ್ರಯತ್ನಿಸಿ.....