ಇಂದು ತುಂಬಾ ದಿನಗಳ ನಂತರ ಮತ್ತೆ ಬ್ಲಾಗ್‌ಗೆ ಬಂದೆ.
ವರ್ಷಗಳಿಂದ ನನ್ನನ್ನು ಕಾಡುತ್ತಿದ್ದ ಮೆನೋಪಾಸ್ ಭೂತ ಸ್ವಲ್ಪ ಬಿಡುಗಡೆ ಕೊಡ್ತಾ ಇದೆ.
ಬೆಳಗಿನಿಂದ ಮಧ್ಯಾಹ್ನದವರೆಗೆ 5೦೦ ಪತ್ರಿಕೆಗಳಿಗೆ ಎಡ್ರೆಸ್‌ ಕತ್ತರಿಸಿ ಅಂಟಿಸಿ ಸ್ಟಾಂಪ್‌ ಹಚ್ಚಲು ಹೆಬ್ಬಾರರಿಗೆ ಕೊಟ್ಟೆ. ನಿನ್ನೆ ಬೆಳಿಗ್ಗೆಯಿಂದ ಶುರುವಾದ ಕೆಲಸ ಮುಂದುವರಿದಿತ್ತು. ಮಧ್ಯಾಹ್ನ 1.30ಕ್ಕೆ ಮುಗಿದು ಪತ್ರಿಕೆ ಪೋಸ್ಟ್ ಸೇರಿತ್ತು.
ಬೆಳಗ್ಗೆ ಎದ್ದು 2 ತಾಸು ಅಕ್ಕಿ ನೆನೆಸಿ ಹಾಲುಗುಂಬಳಕಾಯಿ ಹಾಕಿ ರುಬ್ಬಿ ದೋಸೆ; ತೆಂಗಿನಕಾಯಿ + ಈರುಳ್ಳಿ + ಒಣಮೆಣಸು + ಹುಣಸೆಹಣ್ಣು + ಉಪ್ಪು ಹಾಕಿ ಚಟ್ನಿ ಮಾಡಿದೆ.
ಮಧ್ಯಾಹ್ನ ಊಟಕ್ಕೆ ಮೂಲಂಗಿ ಸಾರು, ಮೀಟರ್‌ ಬೀನ್ಸ್‌ ಪಲ್ಯ.
ಕೆಂಪಕ್ಕಿ ಅನ್ನ ಮಾಡಿದೆ. ಎಲ್ಲ ಚೆನ್ನಾಗಿತ್ತು.
ಮೂಲಂಗಿ ಸಾರು:-
ಇದು ನನ್ನ ಅತ್ತಿಗೆಮಗಳು ಪೂರ್ಣಿಮಾ ಕಲಿಸಿಕೊಟ್ಟ ಸಾರು.
ಮೂಲಂಗಿ, ಟೊಮೆಟೋ ಸ್ವಚ್ಛ ಮಾಡಿ ತೊಳೆದು ಬೇರೆ ಬೇರೆ ಕತ್ತರಿಸಿದೆ.
ಒಂದು ಕಪ್‌ ತೊಗರಿಬೇಳೆ, ಮೂಲಂಗಿ ಬೇಯಿಸಲು ಇಟ್ಟೆ.
ಒಂದು ಪಾತ್ರೆಯಲ್ಲಿ ಒಗ್ಗರಣೆಗೆ ಎಣ್ಣೆ ಹಾಕಿ ಒಂದು ಚಮಚ ಜೀರಿಗೆ, ಅರ್ಧ ಚಮಚ ಸಾಸಿವೆ ಹಾಕಿದೆ. ಖಾರಾಪುಡಿ ಒಂದು ಚಮಚ ಅದಕ್ಕೆ ಹಾಕಿ ತಕ್ಷಣ ಟೊಮೆಟೊ ಹಾಕಿದೆ. ಟೊಮೆಟೊ ಮೆತ್ತಗಾಗುವವರೆಗೆ ಹುರಿದು ನಂತರ ಬೇಯಿಸಿದ ಮೂಲಂಗಿ ನಂತರ ತೊಗರಿಬೇಳೆ ಹಾಕಿದೆ. ನಂತರ ರುಚಿಗೆ ತಕ್ಕಷ್ಟು ಉಪ್ಪು, ನೀರು ಹಾಕಿ ಕುದಿಸಿದೆ. ಇಷ್ಟೇ ಮಾಡಿದ್ದು. ಅನ್ನಕ್ಕೆ ರುಚಿಕರವಾದ ಸಾಂಬಾರ್‌ ರೆಡಿ. ಇದಕ್ಕೆ ತೆಂಗಿನಕಾಯಿ ಬೇಕಿಲ್ಲ. ಮೂಲಂಗಿ ಸೇರುವವರಿಗೆ ಓಕೆ.
ಹಾಗೇ ಮೀಟರ್‌ ಬೀನ್ಸ್‌ ಪಲ್ಯ:-
ಮೀಟರ್‌ ಬೀನ್ಸ್‌ ಒಂದು ಕಟ್ಟು ಒಂದು ಕ್ಯಾಪ್ಸಿಕಂ ಸಣ್ಣಗೆ ಕತ್ತರಿಸಿದೆ.
ಒಗ್ಗರಣೆಗೆ ಎಣ್ಣೆ, ಒಂದು ಚಮಚ ಉದ್ದಿನಬೇಳೆ, ಅರ್ಧ ಚಮಚ ಸಾಸಿವೆ, ಕರಿಬೇವು, ಕಡಲೆಯಷ್ಟು ಇಂಗು, ಕಾಲು ಚಮಚ ಅರಿಶಿನ, ಅರ್ಧ ಒಣಮೆಣಸು, 2 ಹಸಿಮೆಣಸು ಕತ್ತರಿಸಿ ಹಾಕಿದೆ. ನಂತರ ಕತ್ತರಿಸಿದ ಕ್ಯಾಪ್ಸಿಕಂ, ಬೀನ್ಸ ಹಾಕಿ, ರುಚಿಗೆ ಉಪ್ಪು, ಸ್ವಲ್ಪ ನೀರು ಹಾಕಿ ಬೇಯಿಸಿದೆ. ಕೊನೆಯಲ್ಲಿ ಸ್ವಲ್ಪ ತೆಂಗಿನತುರಿ ಹಾಕಿದೆ.
ಮೊಸರು ಕಡೆದು ಮಜ್ಜಿಗೆ ಮಾಡಿದೆ. ಇಷ್ಟು ಮಾಡುವಾಗ ಒಂದೂವರೆ ತಾಸು ಸುಮಾರು ಬೇಕು. ಮತ್ತೆ ಸಮಯ ಇಲ್ಲ ಎಂದು ತಂಬ್ಳಿ ಗಿಂಬ್ಳಿ ಮಾಡಿಲ್ಲ.
ಬೆಳಿಗ್ಗೆ ಯೂಟ್ಯೂಬ್ ವೀಡಿಯೋ ಅಪ್ಲೋಡ್ ಮಾಡಲು ಆಗಿಲ್ಲ. ಸಂಜೆ ಅತ್ತೆ, ಸಣ್ಣತ್ತೆ ಕಷ್ಟಪಟ್ಟು ಮಾಡುತ್ತಿದ್ದ ಚಟ್ನಿಪುಡಿ ರೆಸಿಪಿ ಹಾಕಿದೆ.
ಈ ಚಟ್ನಿಪುಡಿ ನನ್ನ ದೊಡ್ಡ ಮಗ ಚಿನ್ಮಯನಿಗೆ ತುಂಬಾ ಇಷ್ಟವಾಗಿತ್ತು. ಅಜ್ಜಿ ಎಷ್ಟೇ ಬಚ್ಚಿಟ್ಟರೂ ಹುಡುಕಿ ನಮಗೆ 10 ದಿನ ಸಾಕಾಗುವಷ್ಟು ಚಟ್ನಿಪುಡಿ ಎರಡೇ ದಿನದಲ್ಲಿ ಖಾಲಿ ಮಾಡುತ್ತಿದ್ದ!
ಸಣ್ಣತ್ತೆ "ಚಿನ್ಮಯ ಎಲ್ಲಾ ಖಾಲಿ ಮಾಡ್ದ" ಎಂದು ದೂರುತ್ತಿದ್ದರು.
ಅಜ್ಜಿ "ದೇವರಿಗೆ ಕೈಮುಗಿತೆ ತಮಾ ಅಷ್ಟೆಲ್ಲ ತಿನ್ನಡದೋ, ಆಮಶಂಕೆ ಆಗ್ತು" ಎಂದೆಲ್ಲ ಹೆದರಿಸುತ್ತಿದ್ದಳು. ಅದು ಖರ್ಚಾದರೆ ಮತ್ತೆ ಮಾಡುವ ಕಷ್ಟ ಅವರಿಗೇ ಗೊತ್ತಿತ್ತು.
ಅವನಿಗೆ ಅದು ತುಂಬಾ ಇಷ್ಟವಾದ ತಿಂಡಿಯಾಗಿತ್ತು. ದೋಸೆಗಿಂತ ಹೆಚ್ಚು ಚಟ್ನಿಪುಡಿ, ಬೆಲ್ಲ ಸೇರಿಸಿ ತಿನ್ನುತ್ತಿದ್ದ. ಸತತವಾಗಿ ಚಟ್ನಪುಡಿ ತಿಂದು ಅವನ ತುಂಬಾ ಎತ್ತರಕ್ಕೆ ಬೆಳೆದಿದ್ದ. ಬಹುಶಃ ಶೇಂಗಾ, ಬೆಲ್ಲ, ಕರಿಬೇವು ಎಲ್ಲ ಸೇರಿ ಅವನ ಹಿಮೊಗ್ಲೋಬಿನ್‌ ಕೂಡಾ 14ರ ಮೇಲೆ ಇರುತ್ತಿತ್ತು!
ಸಂಜೆ ಹೆಬ್ಬಾರರು ಹಾಗೂ ಮಗ ಸೂರ್ಯ ಗುಡ್ಡದ ಮೇಲೆ ಮಳೆಗಾಲದಲ್ಲಿ ನೆಟ್ಟು ಬದುಕಿದ ಸುಮಾರು 150 ಗಿಡಗಳಿಗೆ ನೀರು ಹಾಕಿ ಬಂದರು.
ನಾನು ಬಾಡುತ್ತಿದ್ದ ಒಂದು ದಾಸವಾಳದ ಗಿಡ ತೆಗೆದು ಲೋಳೆಸರದ ರಸ ಹಚ್ಚಿ ಸರಿಯಾಗಿ ನೆಟ್ಟೆ. ಹಾಗೇ 3 ದಿನಗಳಿಂದ ಮುಚ್ಚಿಟ್ಟುಕೊಂಡಿದ್ದ ಲಿಕ್ವಿಡ್‌ ಫರ್ಟಿಲೈಸರ್‌(ತರಕಾರಿ ಸಿಪ್ಪೆ, ಅಕ್ಕಿ, ಬೇಳೆ ತೊಳೆದ ನೀರು, ಮಜ್ಜಿಗೆ) ಬದನೆ, ತೊಂಡೆ, ಬಸಳೆ, ಹಾಗಲ ಬಳ್ಳಿಗೆ ಹಾಕಿದೆ.
ಇವೆಲ್ಲವನ್ನೂ ದಾಖಲಿಸಬೇಕೆನಿಸಿತು.... ನಿಮ್ಮೊಂದಿಗೆ ಹಂಚಿಕೊಂಡೆ....... ನಿಮ್ಮ ಅಭಿಪ್ರಾಯದ ನಿರೀಕ್ಷೆಯಲ್ಲಿ..... ಧನ್ಯವಾದಗಳು.......
....ಪತ್ರಿಕೆ ಬಂದಾಗ ಇದು ನಮ್ಮ ಪ್ರೀತಿಯ ಕಾಯಕ....
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್ ಮಾಡಿ