ಹಿತ್ತಲ ಬಳ್ಳಿಗೆ ಚಪ್ಪರ ಹಾಕಿದ ಖುಷಿ.....

ನಿನ್ನೆ ಬಂದ ಬೆನ್ನಿನ ನೋವು ಬೆಳಗಿನಿಂದ ಈ ಸಂಜೆಯವರೆಗೆ ಮತ್ತೆ ನೆನಪೇ ಆಗಿಲ್ಲ! ಕಸುವಿನ ಬಳ್ಳಿ ಜಜ್ಜಿ ಸೋಸಿ ಉಳಿದ ಜಗಟನ್ನು ಮತ್ತೆ ನೀರು ಹಾಕಿ ಕುದಿಸಿ ಹಾಲು ಸೇರಿಸಿ ಇಂದು ಬೆಳಿಗ್ಗೆ ಕೂಡಾ ಕುಡಿದಿದ್ದೆ. ಸುಮ್ಮನೆ ಹಾಳಾಗಬಾರದು ಎಂದು. ನರಗಳಿಗೆ ತುಂಬ ಶಕ್ತಿ ನೀಡುತ್ತದೆ ಈ ಕಸುವಿನ ಬಳ್ಳಿ. ಇವತ್ತು ಬೆಳಿಗ್ಗೆ ಗೋಧಿ ಹಿಟ್ಟು, ರವೆ ಸೇರಿಸಿ ದೋಸೆ - ಚಟ್ನಿಪುಡಿ-ಬೆಲ್ಲ-ತುಪ್ಪ. ಮಧ್ಯಾಹ್ನ ಅಲಸಂದೆ ಈರುಳ್ಳಿ ಜೊತೆ ಕೊಂಕಣಿಗರ ಕೊಳಂಬೊ ತರ ಸೂಪರ್ ಸಾಂಬಾರ್. (ರೆಸಿಪಿ ಕೊಟ್ಟಿದ್ದೇನೆ) ಹಾಗೆ ಸವತೆಕಾಯಿ ಹಸಿ ಮಾಡಿದ್ದೆ. ಆಸ್ಪತ್ರೆಯಲ್ಲಿರುವ ಲೀಲಚಿಕ್ಕಿಗೆ ಕಳೆದ ೧೭ ದಿನಗಳಿಂದ ಹೆಬ್ಬಾರರಿಂದ ತಿಂಡಿ, ಊಟ, ಬಟ್ಟೆ, ಕವಳ, ಔಷಧ ಉಪಚಾರದ ಸೇವೆ...... ನಡೆದೇ ಇದೆ. ಅವಳಿಗೆ ಊಟ ಕಳಿಸಿ ಮಗ ಚಿನ್ಮಯ, ನಾನು ಊಟ ಮಾಡಿದೆವು. ಹೆಬ್ಬಾರರು ಆಸ್ಪತ್ರೆಯಿಂದ ೩ಕ್ಕೆ ಬಂದು ಊಟ ಮಾಡಿದರು. ನಮ್ಮ ಮನೆಯ ಗಣಪಿ, ನಾನು ಸೇರಿ ಬಸಳೆ ಬಳ್ಳಿ ಹಾಗೇ ಸೋಣಿಗೆ ಬಳ್ಳಿಗೆ ಚಪ್ಪರ ಹಾಕಿದ್ದು ಇಂದಿನ ತುಂಬಾ ಖುಷಿಯ ವಿಷಯ. ಮಧ್ಯಾಹ್ನ ೧ ಗಂಟೆಯ ಹೊತ್ತಿಗೆ ಬಾಣಂತಿ, ಶಿಶು ಮೀಸಿ ನಮ್ಮ ಮನೆಗೆ ಬಂದ ಗಣಪಿ ಪಾತ್ರೆ ತೊಳೆದು, ನೆಲ ವರೆಸಿ ಮುಗಿಸಿ ಚಪ್ಪರದ ಕಂಬ ಹುಡುಕುವ ತಯಾರಿ ನಡೆಸಿದ್ದಳು. ನನಗೆ ಅಂಗಳ, ಹಿತ್ತಲು, ತೋಟ ಎಲ್ಲೇ ಕೆಲಸ ಮಾಡುವುದಿದ್ದರೂ ನನ್ನ ಜೊತೆಗಾತಿ ಅವಳು. ಅವಳಿದ್ದರೆ ಮಾತ್ರ ನನಗೆ ಆ ಕೆಲಸ ಖುಷಿ. ಭಾರ ಹೊರುವುದು, ಸಾಮಾನು ತರುವುದು, ವಯಸ್ಸಾದವರ ಸೇವೆ ಮಾಡುವುದು.... ಮನೆ ಕೆಲಸ, ತಿರುಗಾಟ.... ಹಂಚು ಹತ್ತಿ ಕಸ ಗುಡಿಸುವುದು..... ಹೀಗೇ ಗಣಪಿ ಮರ ಹತ್ತಲೂ ಸಿದ್ಧ ಸಂದರ್ಭ ಬಂದರೆ ಬಾವಿ ಇಳಿಯಲೂ ಸೈ.

ಇವತ್ತು ಮನೆ ರಿಪೇರಿ ಸಂದರ್ಭ ತೆಗೆದಿಟ್ಟ ಹಾಳಾದ ರೀಪು, ಬಿದಿರುಗಳನ್ನೆಲ್ಲ ಸೇರಿಸಿ ಇಬ್ಬರೂ ಸೇರಿ ಚಪ್ಪರ ಹಾಕಿದೆವು. ಬೀಜದಿಂದ ಹುಟ್ಟಿದ ಬಸಳೆ ಗಿಡ ತುರುರು ಅಂತ ಮೇಲೇಳದೇ ಕುಳಿತಿತ್ತು. ಸ್ವಲ್ಪ ಬುಡ ಬಿಡಿಸಿ ಹೊಂಗೆ ಹಿಂಡಿ ಹಾಕಿದಾಗ ಸ್ವಲ್ಪ ದಿನದಲ್ಲೇ ಸೊಕ್ಕಿನಿಂತ ಮೈಯೆತ್ತಿ ನಿಂತಿತ್ತು. ಹಾಗಾಗಿ ಅದಕ್ಕೆ ಹಬ್ಬಲು ಹಾಗೇ ಅಕ್ಕ ಗುಲ್ಬುರ್ಗಾದಿಂದ ತಂದುಕೊಟ್ಟು ಸೋಣಿಗೆ ಬಳ್ಳಿ ಎರಡಕ್ಕೂ ೩ ಗಂಟೆ ಹೊತ್ತಿಗೆ ಚಪ್ಪರ ಸಿದ್ಧವಾಗಿತ್ತು. ನಂತರ ಗಣಪಿ ಅವಲಕ್ಕಿ, ಚಕ್ಕುಲಿ ತಿಂದು ಚಹಾ ಕುಡಿದು ಸಂಘದ ಮೀಟಿಂಗ್ ಅಂತ ಮನೆ ಕಡೆ ಹೋದಳು. ನಾನು ಪತ್ರಿಕೆಯ ಕೆಲಸ ಆರಂಭಿಸಿದೆ. ಹಾಗೇ ಈಗ ಬರೆದು ಮುಗಿಸಿ ಮದ್ಗುಣಿ ಮಹಾಬಲ ಭಟ್ಟರ ಕವನ ಪಟ್ಟಿ ನೋಡಿ ಟೈಪ್ ಮಾಡುವ ಕೆಲಸ ಮುಂದೆ......

ಅಲಸAದೆ ಸಾಂಬಾರ್ : ಬೇಕಾಗುವ ಸಾಮಾನು- ಅಲಸಂದೆ ನೆನೆಸಿದ್ದು ಅಥವಾ ಮೊಳಕೆ ಬರಿಸಿದ್ದು ಅಥವಾ ಹಾಗೇ ಆದರೂ ಅಡ್ಡಿಯಿಲ್ಲ + ತೆಂಗಿನ ಕಾಯಿ + ಈರುಳ್ಳಿ ಹುರಿಯಲು- ಬಾಣಲಿಗೆ ಎಣ್ಣೆ ಹಾಕದೆ ಕೊತ್ತಂಬರಿ ೨ ಚಮಚ+ ಖಾರಕ್ಕೆ ಬೇಕಾದಷ್ಟು ಒಣಮೆಣಸು ಹಾಕಿ ಹುರಿಯಬೇಕು. ನಂತರ ಸ್ವಲ್ಪ ಅರಿಶಿನ ಹಾಕಿ ಕೈಯಾಡಿಸಿ. ವಿಧಾನ- ಅಲಸಂದೆ ಚೆನ್ನಾಗಿ ಬೇಯಿಸಿಡಿ. ತೆಂಗಿನಕಾಯಿ ಸ್ವಲ್ಪ ಜಾಸ್ತಿ ಬೇಕು. ಹುರಿದ ಮಸಾಲೆ ಜೊತೆ ಸ್ವಲ್ಪ ಹುಣಸೆ ಹಣ್ಣು ಹಾಕಿ ನುಣ್ಣಗೆ ರುಬ್ಬಿ. ೨-೩ ಈರುಳ್ಳಿ ಸ್ವಲ್ಪ ಬೇಯಿಸಿ ಬೇಯಿಸಿದ ಅಲಸಂದೆ + ರುಬ್ಬಿದ ಮಿಶ್ರಣ + ಉಪ್ಪು ಹಾಕಿ ಕುದಿಸಿ. ಒಗ್ಗರಣೆಗೆ- ಎಣ್ಣೆಗೆ ಸಾಸಿವೆ+ಕರಿಬೇವು+ಇಂಗು ಹಾಕಿ ಒಗ್ಗರಣೆ ಕೊಡಿ. ಸುಲಭವಾದ, ರುಚಿಕರವಾದ ಮಕ್ಕಳೂ ಇಷ್ಟಪಡುವ ಅಲಸಂದೆ ಸಾಂಬಾರ್ ಅನ್ನ, ಚಪಾತಿ, ದೋಸೆಯೊಂದಿಗೂ ಸವಿಯಬಹುದು.